غزل- رياض تسنيم
------------------
ځان له مې غم کړی دی
غم مې را کم کړی دی
زړۀ مې وۀ که شين کاڼی
اوس مې نرم کړی دی
دومره غفلت کبر وي
تا خو قسم کړی دی
داسې خود آزاره يم
ځان مې رجم کړی دی
ژبه د سرمد لرم
سر مې قلم کړی دی
دا جهان دا کوږ جهان
کوم سړي سم کړی دی
چا د عاشقۍ وطن
داسې شړشم کړی دی
دا په پټو سترګو څښه
دا جام مې دم کړی دی
زۀ خودسر دې رام نۀ کړم
ځکه مې رم کړی دی
خېر غواړه تسنيمه! بيا
نن ئې کرم کړی دی
----------------++
۱۸ اکتوبر ۲۰۱۷ کراچۍ
ایک تبصرہ شائع کریں