غزل
زړونو ته نۀ ګوري په زړونو کښې لمبو ته ګوري
جينۍ ته ګوره ګلاب نۀ ګوري وږمو ته ګوري
یو تاند هلک د شین زرغون په ننداره ولاړ دے
یوه نیمزاله د یادونو مقبرو ته ګوري
تا هغه څوک څنګه هېر کړے دے دروغ مه وایه
چې په هر پل ستا د چشمانو اشارو ته ګوري
چا مې د سپور وجود د چاودو پښو تپوس ونۀ کړو
څوک مې څپلو ته ګوري څوک زما جامو ته ګوري
هغه زلمي چې د هوا په رخ به نۀ پوهېدل
په کناره د سمندر ولاړ، چپو ته ګوري
خلک خو بِنک بېلنس ته ګوري په کتاب څۀ کوي
یو لېونے د کتابونو المارو ته ګوري
د پښتنو د ناکامۍ اسباب به نور هم وي خو
په شا روان دي د نیکونو کارنامو ته ګوري
د روهستان په ګلستان کښې اے عظیمه خدایه!
نۀ څوک پښتو ته ګوري نۀ څوک پښتنو ته ګوري
اوس د خپل عمر په یو داسې برید ولاړ دے شاکر
د خپل ارمان نه لاس په سر شي چې بچو ته ګوري
۲۴ نومبر ۲۰۲۳ جمعة المبارک
ایک تبصرہ شائع کریں