دې ونو نه د پانړو د بوسو اواز راځي
هوا کښې دې سپرليه د ښکالو اواز راځي
صياد پۀ دغه لاره باندې تېر شۀ يقينن
د خوف فيضا خوره ده د مرغو اواز راځي
ملا جوړې دنيا کښې د جنت اخلي مزې
د شپې اکثر جمات نه د توبو اواز راځي
ما حس کړلو پۀ شور کښې د اوبو , د تيږو درد
د ګټې نه د ګټې زېږېدو اواز راځي
دنيا ترو تازه لکه د باغ ده خو بيا هم
د زيړو زيړو پانړو رژېدو اواز راځي
يۀ زړۀ ورشه زۀ اورم د اشنا سترګو صدا
د سترګو د رموزو مېلمانو اواز راځي
کوهيان درپسې سر ته راختلي ,دي غوږ غوږ
مرۍ نه دې جانانه د اوبو اواز راځي
پۀ زور لکه تنور ته چا نيوالے راله مخ
لۀ سترګو مې د حسن د لمبو اواز راځي
جوړ بيا څښلي زاړه شراب عادل سدابهار
حجرې نه د شمشاد بېګم ببو اواز راځي
عادل سدابهار
ایک تبصرہ شائع کریں