غزل
لار راته ښايي خو پۀ لار راسره تلل نۀ غواړي
دروازه خلاصه کړي د کوره راوتل نۀ غواړي
څومره چې خواته ورنيزدې شم راته لرې ښکاري
لکه چې يار ما پۀ خواصو کښې شمارل نۀ غواړي
څومره خور شوی پۀ ماحول د احساساتو تضاد
غم مو شريک دے خو زما سره ژړل نۀ غواړي
ډېر خبر لوڅه بې معنې شي پۀ دې کوڼ ماحول کښې
ځکه د کار خبره څوک د خلې وېستل نۀ غواړي
دا چې ګړۍ پۀ ګړۍ لارې د نظر بدلوې
فکر مې ستا پۀ فکر دغه شانې زغل نۀ غواړي
يا پۀ معمول کښې د شپې ښکاري طوالت راغلے
يا پۀ دې سيمه د ژوند سترګه راختل نۀ غواړي
خودکلامۍ ته خلق هر قِسم ته رنګ ورکوي
ماښام د ځان قيصه خپل ځان ته اؤرول نۀ غواړي
ایک تبصرہ شائع کریں