لکه شبنم مې لږ د خپل مخ په ګلاب پرېږده
ما ډوبېدو ته د رنګونو په دریاب پرېږده
وخته په سر مې د رقیب په شان مه ودرېږه
لږ مې د یار سره په سوال او په جواب پرېږده
د محبت ځواني مې چل د ستومانۍ زده کوي
لږې دې زلفې په مخ نورې پېچ او تاب پرېږده
هر څو که ورک یو له بله د بیلتون په دشتو
ماله په سترګو کې قطره نیمه شراب پرېږده
زمونږ حجرې اخر حجرې دي جوماتونه نه دي
ناصحه ګوتې مې نغمې ته د رباب پرېږده
په موده پس شو مخامخ وخت مو په لاس کې نشته
یار وې دیدن وکړه حساب پرېږده کتاب پرېږده
چې لږې خاورې په سر باد کړي لږه ساه واخلي
لږ دې کوڅې ته خپل سایل خانه خراب پرېږده
رحمت شاه سائل
ایک تبصرہ شائع کریں