سعید ګوهر مځكه تر پښو لاندې ، په سر باندې اسمان نه لري

 

غزل

سعید ګوهر

مځكه تر پښو لاندې ، په سر باندې اسمان نه لري

پښتون بدبخته شايد خدای هم مهربان نه لري

هغه مزدور چې هره ورځ جوړوي بل ته ماڼۍ

و اوسېدو ته د باړې هم پوخ مكان نه لري

رښتيا وئيلى شي سردار ته ، هر بادار ته د وخت

له مرګه ډار نه لري ـــــــــ خوار ، د ژوند ارمان نه لري

وخته ! باغي دى چې تا نه مني، ستا زور نه مني

بخته ! كافر دى چې په تا باندې ايمان نه لري

داسې حالات دي چې سايه هم ، همسايه نه لرو

ژوند كوو بيا هم مونږ ، حالانكې ژوند امكان نه لري

كله تياره وي ، كله حبس وي ، كله ډېره ګرمي

هغه كوټه يم چې كړكۍ او روشندان نه لري

زما د ټول عمر د لوست دى ، اته لفظه لنډيز

دښمني ګټه نه لري ، مينه تاوان نه لري

انسان ليدى شي مستقبل ، له امكاناتو سره

کائېنات لوئ دی خو وسعت د خيال په شان نه لري

سعيد ګوهره ! کشکې زۀ ئې واى ملنګ د زيارت

شاعران ډېر لري خو هيڅ ژبه رحمان نه لري