غزل :
سعید ګوهر
د یوې پېغلې د یادونو پـــــــــــــــه رنګونو کښې ورک
یو شیش محل وم د خوبونو پــــه خوبونو کښې ورک
داسې هم اوشي ، خبر نــــۀ یم چې سوب ئې څۀ دے
ستا خدوخال شي رانــه ستا په تصویرونو کښې ورک
تـــــــه لکه نمـــــــــر و رڼاګانو تــــــــــه محتاجه نۀ ئې
زه لکه خپل مخ د هینداري پـــــــه ګړځونو کښې ورک
د رواجونو پـــــــــــــــــــــــــه تیارو کښې به تا څۀ لټوم
د کور دېوال دې شو پــــــــــه ډېرو دېوالونو کښې ورک
یاره زړګیه ! څــــــــــۀ درپېښه ده څۀ شوي په تا ؟
څنګه حالات دي چې همېش ئې په سوچونو کښې ورک
د ـ چا لباس و پسرلي تـــــــــه تازګي ورکوي
زما احساس د بېلتانۀ پـــه موسمونو کښې ورک
څۀ دې لهجه ، څۀ دې کمال څــــــــــۀ دې مقام ګوهره !
کۀ دې غزل شــــــــــو د همعصرو په غزلونو کښې ورک
Post a Comment