مړه دې ونه کاته اوده دې نه کړم
نسکور پرې نه وتم نشه دې نه کړم
هسې دې وسوم لوغړن دې کړمه
ګوګل مې يخ نه شو لمبه دې نه کړم
په نننۍ خندا دې ويرېدم
زړه مې غوڅ غوڅ نه شو اره دې نه کړم
د تودې غېږې د خوبونو ياده
خوب دې رانه وستو دمه دې نه کړم
بلاه دې واخلم تر بلۍ رانغلې
مازیګر تېر شو غرغره دې نه کړم
مخې له راغلې ژړغونى دې کړم
په مخه لاړې دلاسه دې نه کړم
څه راته ووايه په څه خفه يې
څه شولې پويه په قيصه دې نه کړم
مينې په هر ميدان دې وګټلم
يو ځاى دې پرې نښوم پيکه دې نه کړم
اوس به مې بیا درته ښېرې کولې
صابره ښه ده چې غصه دې نه کړم
صاحب شاه صابر
Post a Comment