نظر چې می د سترګو په جنت کښې لېونے شو
يو شور شو چې #سايل په محبت کښې لېونے شو
وختونه ورته ټيټ شو خو دا سر ورته ټيټ نه شو
دا زړه چې مې پښتون شو په غېرت کښې لېونے شو
رهبر د زمانې شو يو سبب د انقلاب شو
چې ژوند ئی فلسفه شوه ماديت کښې لېونے شو
وس مردِ قلندر شو اوس د وهم نه منکر شو
دا فکر چې زما په حقيقت کښې لېونے شو
د دار په سر ئی ؤئیل چې باغي يمه منصور يم
جانان ورکړله غېږ چې بغاوت کښې لېونے شو
پېغام ئی د ځوانۍ او د مستۍ زړونو ته راوړو
سپرلے چې د موسم په طبعيت کښې لېونے شو
لائق شو د بخښنې د حساب کتاب نه ؤوت
سائل د اداګانو په قيامت کښې لېونے شو
Post a Comment