د پښتنو کوڅې خو داسې بې ايمانه نه وې
داسې بې ژونده نه وې داسې بې جانانه نه وې
کلونه پس شو سره مخ سره مو وه نه ژړل
د پشکال ورېځې داسې بې بارانه نه وې
مه حيرانېږه که حیران حيران درګورمه نن
ته چېرته داسې په شا تللې د خندا نه نه وې
زه مې په مينه چرته داسې شکي شوی نه وم
ته چېرته دومره لرې تللې د امکانه نه وې
نه مو چا شور واورېدو نه مو چرته اور پورې که
جذبې د مينې خالي داسې د وجدانه نه وې
مونږه د ځمکې لېوني به درته څه يادېدو
ته که پرېوتې د خپل حُسن د اسمانه نه وې
رحمت شاه سائل🖤🥀
Post a Comment