غزل
روغه به وکړو زه او ته سره اشنا خپلو کښې
الله دې نه کړى يو تر بله څوک جدا خپلو کښې
پرواه ئې مه کوه د وخت قاضى به هرڅه وائى
د چا څه کار دے زه او تا چې يُو رضا خپلو کښې
د بېلتانه څو ورځې شپې وې لاړې تېرې شولې
اوس به ژوندون زمونږ تېريږى په خندا خپلو کښې
د وصال شپه وى لنډه لنډه څومره زر تېره شى
چې دوه ياران کوى خبرې تر سبا خپلو کښې
دا چې مسکے مسکے خوشحاله خوشحال ښکارمه نن
خوب کښې اوده وو په يوه څنګل بيګا خپلو کښې
صادق اسراره دا به لوظ دا به اقرار وى زمونږ
کوو به ټول عمر يو بل سره وفا خپلو کښې
Post a Comment