امجد شهزاد
/
هغه شاعر چې دَ دردونو حساب هم نۀ لري
غضب خو دا دے چې يو ټکے شراب هم نۀ لري
/
ما ته معلوم دے يو سړے دَ محبت مريد دے
هېڅ کار پۀ ژوند کښې پۀ ګناه اؤ ثواب هم نۀ لري
/
دَ دې اولس نه هر څۀ مۀ تښتوه سپي شُوکماره
ژوند به پۀ څۀ کوي چې ټنګ دَ رباب هم نۀ لري
/
زما مرام ښکاره، مطلب صفا، معنيٰ واضحه
زما لفظونه ضرورت دَ اعراب هم نۀ لري
/
بيا چې دَ کفر فتوٰي نۀ لګوي څۀ به کوي؟
يوې پوښتنې ته دَ چا چې جواب هم نۀ لري
/
کوي دَ هغه سړي قدر بيا هم ټوله دنيا
چې لۀ اسمانه نازل شوے کتاب هم نۀ لري
/
دَ ښار امير دَ ټولو خلکو نه پۀ څۀ مالدار دے؟
پۀ خپل کتاب کښې چې اوچ شوے ګلاب هم نۀ لري
/
ويرېږه مۀ ، پۀ خدائے توکل کړه، واخله جام زاهده!
ځنې ګناه داسې ګناه وي عذاب هم نۀ لري
/
امجد دَ فن اؤ فکر داسې خزانه موندلې
مُلا خو پرېږده چې ئې خان اؤ نواب هم نۀ لري
♫ ♫ ♫
Post a Comment