غزل
سکون لاړ شي ــــ چې بېسياره شي دولت
ژوند بې خونده شي چې حد شي د غربت
ساګ سکړک چې در رسيږي ـــ غنيمت دے
چې بخښلے درته رب وي ـــــــ روغ صحت
د مال حرص ــــــــــ د ژوندون مدعا نۀ ده
نعمتونو کښې ــــــــــــــــ نعمت دے قناعت
چې پۀ زور غصب د خوارو برخه اوخوري
داسې خلګو باندې ـــــــــ رب کړي تُو لعنت
چې د بل پۀ ګټه ژوند کړي ښاد به نۀ شي
مدام اوسي به ـــــــــــــ سر کوزے ملامت
د هغه عمل نه ـــــــــــــــــــ لرې لرې ګرځه
چې کولے ئې ــــــــــــ بيا نۀ شې وضاحت
د قامونو د عروج نه ـــــــــــــ سبق واخله
چې تسخير ئې ـــــ کائنات کړۀ پۀ حکمت
چې سبب شې ـــــــــ د تذليل انسانيت له
طمع دار نۀ شې ــــــــــــــ سراجه د جنت
Post a Comment