**د درد کلیات // ۱۲۸**
**غزل**
مۀ غوارۀ کلۀ! د خوښیانو، د غمونو حساب
يارۍ کښې نۀ کېږي د ګوتو پۀ سرونو حساب
ځۀ پۀ مزه مزه مې مخ تۀ آئينه کښې کتل
د تندي کونځو کړو رامنځتۀ د وختونو حساب
نۀ د انسان پۀ درد زهیر شوې نۀ د قام پۀ حالت
ته به هم غواړې چې ستا سر شې په سرونو حساب
زما د نن ورځ گناهونه د شمېرلو نۀ دي
تۀ رانۀ غوارې ای رحیمۀ! د عمرونو حساب
زۀ بۀ لۀ هغۀ الله نۀ غوارم ستا د وصل موسم
د ګل پۀ پاڼو چې ليکي د موسمونو حساب
خپلې ښېګړې زبادوې پۀ ما، زما ملګري
زۀ بۀ لۀ چا سره کوم د پرهرونو حساب
اول دې مینه راکړۀ خدایه! بيا د گل غوندې يار
"درد" بۀ پۀ پۀ څۀ خلاصوي ستا د نعمتونو حساب
پروفيسر رحمت اللّٰه درد
Post a Comment