کلام
ارواښاد روغانې بابا
عنوان
ګوپي
څوک چې پېسه خور شي د خپل قوم د هر سړي په سر
دا لکه چې خوري د خپلې لور او د بي بي په سر
ځنې سياست کښې اميري او بادشاهي ګوري
ځنې ئې ګټي د خدائې قرآن او د نبي په سر
کټ د جنازې دے مخکښې خان او تالي سټ روان
وروستو دواړو پښې ئې دي د پير او مولوي په سر
څوک په علم و فن او په هنر باندې سړي نه شو
بل خوا ډېر سړي شو تش د ډېر فضل ربي په سر
ښۀ پښتون جولا دے چې په لاسو پښو محنت کوي
ښۀ پښتون چميار دے د رينې او د رمبي په سر
ښۀ پښتون نائي دے چې د شپې، ورځې محنت کوي
ښۀ پښتون مزدور دے د بېلچې او د ټاټکي په سر
ښۀ پښتون دهقان دے چې غلې کري مېوې کري
ښۀ پښتون لوهار دے د سندان او سټکي په سر
هر يو هنرمند د پختونخوا خان خانان ګڼم
څه خوشې خاني ده د بنګلې او د پټي په سر
وخت دے روغانيه! چې تميز اوکړي په ګلو کښې
نور به بوراګان اونه بڼيږي د ګوپي په سر
Post a Comment