یو لاس کښې ملغلرې بل کښې تار راواخله پیره
څو څاڅکي د شبنم دې د رخسار راواخله پیره
دا سترګې او باڼهً به درته لاره کښې کرمه
ته یو قدم زما په لور په لار راواخله پیره
د تیغ او د تفنګ او د بارودو دې څه جوړ کړل
دا درې واړه عبث دي یو ستار راواخله پیره
راځه چې دا د شر او د فساد تیًرې سنګسار کړو
له ستورو لمن ډکه کړه بې شمار راواخله پیره
سردار به چې په سر کښې وو ولاړ هغه سر نشته
اوس میر د قافلې شه خپل دستار راواخله پیره
خدایان د زمانې به دې د ژوند کشتۍ کړي ډوبه
بس نوره دې اسره د کردګار راواخله پیره
سجده کښې که سرور غواړې د زړه حرم دې پاک کړه
دا یو سبق زما د ګناهګار راواخله پیره
د حسن و عشق قیصه لکه د ګل او د سور اور ده
خلیل فطرت مې وایي چې انګار راواخله پیره
Post a Comment